Asi comezamos...

O Grupo de Acción Ecoloxista “Outeiro” nace nos primeiros anos da década dos oitenta, ó mesmo tempo que xurde en Galicia a concienciación contra os vertidos radioactivos que outros países están a facer no  cemiterio nuclear da “Fosa Atlántica”, situado a menos de duascentas millas das costas galegas.

Un grupo de xoves, na súa maioría estudantes, preocupados pola natureza no seu estado máis xenuino, xúntanse  habitualmente para falar de temas que lles son próximos. Ó mesmo tempo non lles son alleos os acontecementos de actualidade que se producían por mor dos vertidos radioactivos.

Coñecedores do problema que se viña enriba das costas galegas, intégranse na plataforma antinuclear e participan, xunto con outras forzas políticas, sindicais e sociais de Galicia, na marcha que se organiza para protestar no territorio inglés polos vertidos diante das costas galegas.

O viaxe realizouse no coñecido como autobús antinuclear. Un vello autobús de dous pisos, que noutra época  circulara por as rúas de Londres e axeitado para a ocasión, serviu para facer a viaxe ata ó Reino Unido atravesando parte de España e Francia.
 
As accións reivindicativas no territorio inglés consistiron en manifestacións de protesta diante do Parlamento inglés, encadeándose algúns dos representantes ó edificio foron liberados das cadeas polas forzas de seguridade inglesas, que os presentaron diante da Corte de Xustiza, condenándoos a non poder entrar no Reino Unido en varios anos.

Ó regreso do autobús a Galicia percorréronse as poboacións de onde eran nativos os compoñentes da marcha de protesta, con broche final en Santiago.

Estas accións reivindicativas foron seguidas puntualmente pola prensa nacional e internacional,  que xunguidas ás notas oficiais de protesta do goberno español, valeron para poñer punto final ós vertidos radioactivos no mar e fronte ás costas galegas.

Con esta popularidade por diante xurde a necesidade de proceder á legalización da asociación, xa que o número de asociados e máis o ámbito das actividades ían en aumento. É por eso que o luns 2 de abril de 1984, constitúese a comisión xestora, formada inicialmente por Juan Míguez Otero, José Viñal Rodríguez, Avelino González Pedrouzo e Félix Angel Gómez Morales, para legalizar a asociación.

En xuño dese mesmo ano o Ministerio do Interior aproba os estatutos e o Grupo de Acción Ecoloxista Outeiro queda inscrito no Rexistro Nacional de asociacións co número 55.623, e co 364 da provincia de Ourense, ó tempo que o Ministerio de Economía e Facenda asínalle o C.I.F. número B32014987.